إنه الشّخص ( سواء ذكر أم أنثى) الذي يستعرض شخصيّته من خلال التّباهي ببعض الأشياء التي يمتلكها وكأنه ولد وفي فمه ملعقة من ذهب أو من خلال تهويله لبعض الأحداث التي حدثت معه ليصف نفسه بأنه كان بطل الموقف. كما يتّصف هذا الشّخص بالسطحيّة في التفكير وفقدان الثّقة بالنفس.
إليكم العبارات التالية التي يتلفّظ بها العرّيط الذّكر:
- شو هادا يازلمة، جنّنتني صاحبيتي تلفونات وعياط ، ميتة علي مش قادرة على فراقي ولو لحظة ! ( ببصم بالعشرة إنو الموقف معكوس تماما)
- إمبارح شريت قميص Brand new بس ب 90 دينار. ( يرحم جدّك اللي كان يخيّط برداية المطبخ ويعملها قميص عشان يلبسها على أفرهول الشيالات)
- بنات العيلة مجنّناتني، انت أحلى من براد بيت وأحلى من مهنّد وكريم لو بس تندل عليك هوليود. ( ولكم هاذا ملطشة العيلة، إمو عرضتو على كل بنات العيلة ورفضوه).
- أنا مستحيل أنا وأبوي وإمي نروح نتغدّى إلا بمطعم فايف ستارز ويكون في reservation قبل بيوم ، يعني حجز مسبق. ( لسّة الجمعة الماضية كان على طريق المطار لابس الشبّاح الأبيض وإمو وأبوه هلكوا صحتو وهو يهف عاللّحمة! ).
- يازلمة شو فيها تشرب Beer وانت عالشّط ؟ عادي يازلمة كون كوووول. ( لاتعليق)
ومن عبارات العرط التي تتلفّظ بها الإناث:
- أنا مستحييييل آكل غير Salads مابقدر على الأكل العربي. ( وطنجرة المقلوبة اللي طفحتي نصها الأسبوع الماضي ؟)
- ممم معلش بس كيف بتنكتب هاي الكلمة بالعربي لأنو مو كتير شاطرة فيه . أغلب الإيميلات ببتعهم بالإنجليزي. ( حبيبت قلبي والحجّة ستّك أم أبوكي اللي بتخبّوها بالأعراس كيف الآكسنت تبعتها باللّه؟).
- يا اللّه كتير بتدايق من نظرات الشباب بالشّارع طيّب يعني أول مرة بشوفوا بنت حلوة؟ ( أصلا هيّة طالعة عشان تطلعلها بكلمة حلوة).
- أنا عفكرة مابعرف ولاااا إشي بالمطبخ. ( إمها دابحيتها تفريم بصل وتقشير بطاطا وتنظيف جاج).
- أنا هادا الشوز ( يعني الحذاء) صاحبت بنت خالت أخت مرة ابن عمّي جابتلي ياه من باريس. ( طيّب ليش ماتكوني واضحة وتحكي انك جبتيه من سوق الجمعة ؟ ).
هذه مجرّد بعض المفاتيح التي تدلّكم على الشّخص العرّيط. نتمنّى لكم اكتشافا موفقا :)
ليست هناك تعليقات:
إرسال تعليق